Ambasadori i Britanisë së Madhe në Kosovë, shkëlqesia e tij z. Jan Cliff vizitoi të hënën KEK-un. Ai është pritur nga Drejtori Menaxhues i KEK-ut, z. Arben Gjukaj.

“KEK-u definitivisht është duke ecur përpara me ritme të shpejta. Të gjitha faktet e tregojnë këtë. Padyshim energjia elektrike është jetike për zhvillimin ekonomik të vendit dhe misioni juaj në këtë drejtim është jashtëzakonisht i rëndësishëm”, tha z. Cliff. Ai shprehu mbështetjen e tij të plotë për proceset në të cilat po kalon korporata. “Jam i lumtur që ju po punoni në shumë projekte të rëndësishme, sidomos ato ambientale. Kjo tregon orientimin e drejtë të KEK-ut. Gjithashtu jam i bindur se procesi i privatizimit do të kryhet në mënyrën më të mirë të mundshme në mënyrë që të avancohet edhe më tutje sektori energjetik i Kosovës”, shtoi z. Cliff.

Në lidhje me gjendjen e KEK-ut ambasadorin e ka informuar z . Gjukaj. “ KEK-u ka rritur prodhimin në katër vjetët e fundit vazhdimisht me 5 deri në 10 për qind çdo vit edhe pse kapacitetet mbesin të njëjta. Kjo është arritur falë angazhimit maksimal të punëtorëve të korporatës dhe investimeve në asetet kyçe. Jemi të përkushtuar që të rrisim prodhimin në kapacitetet e dizajnuara në të gjitha blloqet”, tha z. Gjukaj. Ai e ka informuar ambasadorin edhe në lidhje me projektet mbështetëse. “Sivjet do të fillojmë me ndërrimin e elektrofiltrave të njësive të Termocentralit “Kosova A”. Emisioni në to do të jetë brenda standardeve të BE-së. Po e zëvendësojmë transportin e hirit nga shiritat e hapur në sistem hidraulik nga Kosova A sikurse kemi mbuluar kodrat e hirit me dhe kemi eliminuar substancat e rrezikshme. Pra, kemi punuar në eliminimin e katër ndotësve kryesor”, shtoi z. Gjukaj.